மொழிப்போர் என்பது ஒரு மொழியைப் பாதுகாப்பதற்கான போராட்டம் மட்டுமல்ல; தாய்மொழி உரிமை, கல்வி உரிமை, வேலைவாய்ப்பு மற்றும் சமூக நீதிக்கான குரலுமாகும். அந்த உரிமைக் குரலுக்காக இளம் வயதிலேயே தன்னை அர்ப்பணித்தவர் மாணவர் லூர்துநாதன்.
டி. எஸ். லூர்துநாதன் (23.08.1949 – 21.11.1972)
1949 ஆகஸ்ட் 23 அன்று பிறந்த லூர்துநாதன், பாளையங்கோட்டை தூய சவேரியார் கல்லூரியில் பயின்ற மாணவர். வெறும் 23 ஆண்டுகளே நீடித்த அவரது வாழ்க்கை, மொழியுணர்வும் மாணவர் உரிமை உணர்வும் இணைந்த ஒரு தலைமுறையின் போராட்ட வரலாற்றை நமக்கு நினைவூட்டுகிறது.
1965 ஆம் ஆண்டு தமிழகம் முழுவதும் எழுந்த இந்தி எதிர்ப்புப் போராட்டம், இந்தி மொழியைத் திணிப்பதற்கு எதிராகவும், எந்த மொழியும் பிறமொழி பேசுவோர் மீது கட்டாயமாகத் திணிக்கப்படக் கூடாது என்ற அடிப்படையிலும் முன்னெடுக்கப்பட்டது.
பள்ளி, கல்லூரி மாணவர்களின் பங்கேற்புடன் நடைபெற்ற அந்த எழுச்சியில் பாளையங்கோட்டையும் குறிப்பிடத்தக்க பங்காற்றியது. இளம் வயதிலேயே இந்த எதிர்ப்புப் போராட்டங்களில் லூர்துநாதனும் பங்கேற்றார் என்பது அவரது வாழ்வில் தனியாக நினைவுகூரப்பட வேண்டிய செய்தியாகும்.

மாணவர் என்பவர் வகுப்பறைக்குள் மட்டும் முடங்கிக் கிடப்பவர் அல்ல; சமூக அநீதிகளுக்கு எதிராகக் கேள்வி எழுப்பும் பொறுப்புள்ள குடிமகன் என்பதை லூர்துநாதனின் வாழ்க்கை உணர்த்துகிறது.
1972 நவம்பர் 19 அன்று பாளையங்கோட்டையில் பேராசிரியர் அ. சீனிவாசன் தாக்கப்பட்டதைத் தொடர்ந்து, மாணவர்கள் நடத்திய எதிர்ப்புப் போராட்டத்தின் பின்னணியில், நவம்பர் 21 அன்று தாமிரபரணி ஆற்றில் லூர்துநாதன் உயிரிழந்தார். அவரது மரணம் தொடர்பான சூழலை விசாரிக்க நீதிபதி ராஜு தலைமையில் விசாரணை ஆணையம் அமைக்கப்பட்டது.
இந்தச் சம்பவம் 1965 மொழிப்போர் நிகழ்வுகளிலிருந்து காலத்தால் வேறுபட்டதாக இருந்தாலும், அநீதிக்கு எதிராக மாணவர்கள் குரல் கொடுத்த போராட்ட வரலாற்றின் தொடர்ச்சியாக லூர்துநாதனின் தியாகம் நினைவுகூரப்படுகிறது.
அவரது நினைவாகப் பாளையங்கோட்டை தெற்கு பஜாரில் நிறுவப்பட்ட சிலையை 1975 பிப்ரவரி 26 அன்று பெருந்தலைவர் காமராஜர் திறந்து வைத்தார்.

நினைவுச் சின்னங்கள் கல்லால் கட்டப்படலாம்; ஆனால் அவற்றின் உண்மையான அர்த்தம் அடுத்த தலைமுறையினரின் மனதில் தொடர்ந்து வாழ்வதில்தான் இருக்கிறது.
இந்தி திணிப்பை எதிர்த்த அவரது இளமைக் குரலை அடுத்த தலைமுறைக்குக் கடத்துவதே உண்மையான நினைவஞ்சலியாகும்.
இன்று, 21 நவம்பர் 2026, லூர்துநாதனின் 54 ஆம் ஆண்டு நினைவு நாள்.
அவரது நினைவுப் படத்தில் இடம்பெறும், “அவர்களுடைய செயல்கள் அவர்களைப் பின்தொடரும்” என்ற இறைவார்த்தையைப் போல, அவர் விட்டுச் சென்ற மொழியுரிமைக் குரலும் என்றும் ஒலித்துக்கொண்டிருக்கட்டும்!
– லூர்து பால் பெல்சன் தே | வழக்கறிஞர்- சென்னை உயர்நீதிமன்றம்
