தந்தையின் வழியில் மகன்!
இளவரசர் வில்லியமின் தந்தை மன்னர் சார்லஸ், மன்னராகப் பொறுப்பேற்பதற்கு முன்பே பல ஆண்டுகளாக சுற்றுச்சூழல் பாதுகாப்பு, இயற்கை வளங்களைப் பாதுகாத்தல், பருவநிலை மாற்றம் போன்ற விவகாரங்களில் தீவிர ஆர்வம் காட்டி வந்தார்.
அதே அக்கறையை அடுத்த தலைமுறைக்குக் கொண்டு சென்றுள்ள வில்லியம், சுற்றுச்சூழல் பாதுகாப்புடன் சர்வதேச ஒத்துழைப்பு, புதிய தொழில்நுட்பங்கள், ஊடகங்களின் கவனத்தை ஈர்க்கும் அணுகுமுறை ஆகியவற்றையும் இணைத்துச் செயல்படுகிறார்.
2020-ம் ஆண்டு தொடங்கப்பட்ட எர்த்ஷாட் பரிசு, உலகின் சுற்றுச்சூழல் பிரச்சினைகளுக்குப் பயனுள்ள நடைமுறைத் தீர்வுகளை உருவாக்கும் தனிநபர்கள், நிறுவனங்கள் மற்றும் அமைப்புகளை அடையாளம் கண்டு ஊக்குவிப்பதை நோக்கமாகக் கொண்டுள்ளது.
மும்பையில் நவம்பர் 17-ம் தேதி நடைபெறும் விருது வழங்கும் விழாவில், தேர்ந்தெடுக்கப்படும் ஐந்து வெற்றியாளர்களுக்கும் தலா 10 லட்சம் பவுண்டு (இந்திய மதிப்பில் சுமார் ரூ.11 கோடிக்கும் மேல்) பரிசுத் தொகை வழங்கப்பட உள்ளது.
இந்தத் திட்டத்தின் ஐந்து முக்கிய இலக்குகள்:
-
இயற்கையைப் பாதுகாத்து மீட்டெடுத்தல்.
-
காற்று மாசுபாட்டைக் கட்டுப்படுத்துதல்.
-
கடல் வளங்களைப் பாதுகாத்தல்.
-
கழிவுகள் இல்லாத உலகை உருவாக்குதல்.
-
பருவநிலை மாற்றத்தைச் சரிசெய்தல்.
இந்தியாவுக்கு ஏன் முக்கியத்துவம்?
இந்தியாவை இந்த நிகழ்ச்சிக்கான இடமாகத் தேர்ந்தெடுத்திருப்பது குறிப்பிடத்தக்கது. நகர்ப்புறக் காற்று மாசுபாடு, குப்பை மேலாண்மை, அதிகரித்து வரும் எரிசக்தித் தேவை, பொருளாதார வளர்ச்சி உள்ளிட்ட பல்வேறு சுற்றுச்சூழல் சவால்களை இந்தியா எதிர்கொண்டு வருகிறது.
அதேநேரத்தில், இந்தப் பிரச்சினைகளுக்குத் தீர்வு காணும் வகையில் பல்வேறு புதிய தொழில்நுட்பங்களையும் புதுமையான திட்டங்களையும் இந்தியா உருவாக்கி வருகிறது.
எர்த்ஷாட் திட்டத்தின் இறுதிப் போட்டி நிலையை ஏழு இந்தியத் திட்டங்கள் எட்டியுள்ளன. இதற்கு முன்பு நான்கு இந்தியத் திட்டங்கள் இந்த விருதை வென்றுள்ளன.
மேலும், 2026-ம் ஆண்டுக்கான திட்டத்தின் ஒரு பகுதியாக, 24 மாநிலங்களில் உள்ள 15,000 பள்ளிகளைச் சேர்ந்த சுமார் 10 லட்சம் மாணவர்களை உள்ளடக்கிய இளைஞர் பங்கேற்புத் திட்டமும் செயல்படுத்தப்படுகிறது.
மாறும் அரச குடும்ப அணுகுமுறை!
இந்தியாவின் சுற்றுச்சூழல் முயற்சிகளை உலக அரங்கில் முன்னிறுத்துவதுடன், இந்தியாவுடனான உறவுகளையும் வலுப்படுத்தும் வாய்ப்பாக வில்லியமின் பயணம் அமைந்துள்ளது.
இந்தியாவுக்கும் பிரிட்டிஷ் அரச குடும்பத்துக்கும் இடையிலான உறவு வரலாற்றுப் பின்னணியைக் கொண்டது. ஒரு காலத்தில் இந்தியாவை ஆட்சி செய்த பிரிட்டிஷ் பேரரசுடன் அரச குடும்பம் நெருங்கிய தொடர்பு கொண்டிருந்தது. ஆனால், இன்று இந்தியா சுதந்திரமான, உலகளவில் வளர்ந்து வரும் வல்லரசு நாடாகத் திகழ்கிறது.
பிரிட்டிஷ் அரச குடும்பத்துக்கு இந்தியாவில் ஆட்சி அதிகாரம் இல்லாவிட்டாலும், அந்தக் குடும்பத்தின் மீதான மக்களின் ஆர்வம் தொடர்ந்து நீடிக்கிறது.
”இன்றைய ஊடகச் சூழலில் அரச குடும்பத்தின் பாரம்பரியமான விழாக்கள், சம்பிரதாய நிகழ்ச்சிகள் மட்டும் மக்களைச் சென்றடையப் போதுமானதாக இல்லை என்பதை வில்லியம் உணர்ந்துள்ளார்.”
இதற்கு உதாரணமாக, கடந்த மாதம் பிபிசியின் ‘தி கிரஹாம் நார்டன் ஷோ’ நிகழ்ச்சியில் அவர் திடீரெனப் பங்கேற்றதைக் குறிப்பிடலாம்.
நடிகர்கள் கேட் பிளான்செட், ஹன்னா வாடிங்ஹாம் மற்றும் சுற்றுச்சூழல் ஆர்வலர் ராபர்ட் இர்வின் ஆகியோருடன் ஒரே மேடையில் அமர்ந்து பேசினார். எர்த்ஷாட் விருது, தனது குழந்தைகளுக்குப் பிடித்த தொலைக்காட்சி நிகழ்ச்சிகள், திரைப்படங்கள், இசை உள்ளிட்ட பல்வேறு விஷயங்களைப் பகிர்ந்துகொண்டார்.
பொதுவாக அரச குடும்பத்தினர் கடைப்பிடிக்கும் கட்டுப்பாடான நேர்காணல் முறையிலிருந்து இது முற்றிலும் மாறுபட்டதாக இருந்தது. அந்த நிகழ்ச்சியில் பங்கேற்ற முதல் பிரிட்டிஷ் அரச குடும்ப உறுப்பினர் என்ற பெருமையையும் வில்லியம் பெற்றார்.
இது தற்செயலான நிகழ்வு அல்ல. அரச குடும்பத்தைப் பற்றி அதிகம் ஆர்வம் காட்டாத இளம் தலைமுறையினரையும் சென்றடையும் நோக்கில் மேற்கொள்ளப்பட்ட புதிய ஊடக அணுகுமுறையாகும்.
சகோதரர்களுக்கு இடையிலான கருத்து வேறுபாடுகள்!
அரச குடும்பத்தின் எதிர்காலத் தலைவராக உருவெடுக்கும் வில்லியமுக்கு குடும்ப ரீதியாகவும் பல சவால்கள் உள்ளன.
அவரது தம்பி இளவரசர் ஹாரி, அரச குடும்பத்தின் மூத்த உறுப்பினர் பொறுப்பிலிருந்து விலகி, தனது மனைவி மேகனுடன் அமெரிக்காவில் தனியாக வசித்து வருகிறார்.
வில்லியம் அரச குடும்பத்தின் பாரம்பரியத்தையும் தொடர்ச்சியையும் பிரதிநிதித்துவப்படுத்துகிறார். ஹாரியோ அரச குடும்ப அமைப்புக்கு வெளியே தனக்கென ஒரு புதிய அடையாளத்தை உருவாக்க முயன்று வருகிறார்.
இருவரது மனைவிகளான கேத்தரின், மேகன் ஆகியோரையும் ஊடகங்கள் தொடர்ந்து ஒப்பிட்டுப் பேசுகின்றன.
யார் மக்களிடம் அதிக நெருக்கமாக இருக்கிறார்கள்? யாருக்கு அதிக வரவேற்பு கிடைக்கிறது? யார் அதிகம் பிரபலமாக இருக்கிறார்கள்? என்ற விவாதங்கள் சமூக வலைதளங்களில் தொடர்ந்து நடைபெறுகின்றன.
இத்தகைய ஒப்பீடுகள் அரச குடும்பத்தின் ஒற்றுமையைப் பாதிக்கக்கூடியவை. அதே நேரத்தில், இன்றைய ஊடக உலகில் அரச குடும்பத்தினர் தவிர்க்க முடியாமல் எதிர்கொள்ள வேண்டிய சவால்களாகவும் உள்ளன.
ஐரோப்பிய அரச குடும்பங்கள்!
பிரிட்டன் மட்டுமல்ல, ஐரோப்பாவின் மற்ற அரச குடும்பங்களும் மாறிவரும் மக்கள் எதிர்பார்ப்புகளுக்கு ஏற்ப தங்களை மாற்றிக்கொள்ள வேண்டிய கட்டாயத்தில் உள்ளன.
நெதர்லாந்து மன்னர் வில்லெம் அலெக்சாண்டர், அவரது மனைவி மாக்சிமா ஆகியோர் 2020-ம் ஆண்டு கொரோனா கட்டுப்பாடுகள் அமலில் இருந்தபோது கிரீஸ் நாட்டுக்குச் சுற்றுலா சென்றனர்.
இதற்கு பொதுமக்களிடமிருந்து கடும் எதிர்ப்பு எழுந்ததால், அவர்கள் பயணத்தைப் பாதியிலேயே முடித்துக்கொண்டு நாடு திரும்பினர். பொதுமக்களின் மனநிலையைத் தவறாகக் கணித்துவிட்டதாக மன்னரும் ஒப்புக்கொண்டார்.
டென்மார்க்கில் வேறுவிதமான மாற்றம் நிகழ்ந்தது. 52 ஆண்டுகள் மன்னராக இருந்த ராணி மார்கரெட் இரண்டாம், 2024 ஜனவரியில் தனது பதவியைத் துறந்தார். இதையடுத்து அவரது மகன் பிரெடெரிக் பத்தாம் மன்னரானார்.
ஆஸ்திரேலியாவில் பிறந்த அவரது மனைவி மேரி ராணியானார். தலைமுறை மாற்றத்துடன் அரச குடும்பத்தின் பாரம்பரியத்தையும் பாதுகாக்கும் முயற்சியாக இது அமைந்தது.
ஸ்பெயின் நாட்டின் அனுபவமும் குறிப்பிடத்தக்கது. அந்நாட்டு மன்னர் ஃபெலிப் ஆறாம், 2014-ம் ஆண்டு தனது தந்தை ஜுவான் கார்லோஸிடமிருந்து ஆட்சிப் பொறுப்பை ஏற்றார்.
அப்போது அரச குடும்பத்தின் நிதி மற்றும் தனிப்பட்ட விவகாரங்கள் தொடர்பான சர்ச்சைகளால் அதன் நற்பெயர் பாதிக்கப்பட்டிருந்தது.
இதனால், பொறுப்பேற்ற பின்னர் வெளிப்படைத்தன்மை, நேர்மை ஆகியவற்றுக்கு முக்கியத்துவம் அளித்து அரச குடும்பத்தின் நிதி நிர்வாகம் மற்றும் செயல்பாடுகளில் சீர்திருத்தங்களை மேற்கொண்டார்.
இந்த அனுபவங்கள் அனைத்தும் ஒரு முக்கியமான உண்மையை உணர்த்துகின்றன. அரச குடும்பத்தின் மீதான மக்களின் நம்பிக்கை என்பது பரம்பரைச் சொத்தாகத் தானாகக் கிடைத்துவிடாது. ஒவ்வொரு தலைமுறையும் அதைத் தங்களது செயல்பாடுகள் மூலம் நிரூபிக்க வேண்டும்.
வில்லியமின் முன்னால் உள்ள சவால் என்ன?
சுற்றுச்சூழல் பாதுகாப்புக்காக வில்லியம் முன்னெடுத்து வரும் எர்த்ஷாட் திட்டம், அவருக்கு ஒரு புதிய சர்வதேச அடையாளத்தை உருவாக்கித் தரக்கூடும்.
உலக நாடுகளுக்கு இடையிலான ஒத்துழைப்பு, புதிய கண்டுபிடிப்புகள், சுற்றுச்சூழல் பாதுகாப்பு ஆகியவற்றை ஒருங்கிணைக்கும் தளமாக இந்தத் திட்டம் விளங்குகிறது.
ஆனால், பிரபலமடைவதற்கும் மக்களின் நம்பிக்கையைப் பெறுவதற்கும் இடையே மிகப்பெரிய வித்தியாசம் உள்ளது.
தொலைக்காட்சி நிகழ்ச்சியில் பங்கேற்பது, சமூக வலைதளங்களில் கவனம் பெறுவது, சர்வதேச விருது விழாவில் கலந்துகொள்வது ஆகியவை ஒருவரை மக்களிடம் பிரபலமாக்கலாம். ஆனால், எதிர்கால மன்னராக மக்களின் மதிப்பையும் நம்பிக்கையையும் பெறுவதற்கு இவை மட்டும் போதாது.
அரச குடும்பம் சமூகத்துக்குப் பயனுள்ள வகையில் எவ்வாறு செயல்படுகிறது என்பதே அதன் எதிர்கால மதிப்பைத் தீர்மானிக்கும்.
வில்லியமின் மும்பை பயணம் பல்வேறு கோணங்களில் கவனிக்கப்படும். சுற்றுச்சூழல் சாதனைகள், சர்வதேசப் பிரபலங்களின் பங்கேற்பு, இந்தியாவின் புதிய கண்டுபிடிப்புகள் ஆகியவற்றுடன், பிரிட்டனின் எதிர்கால மன்னராக அவர் எத்தகைய தனித்துவமான அடையாளத்தை உருவாக்குகிறார் என்பதும் முக்கியமாகப் பார்க்கப்படும்.
பல தலைமுறைகளாக மக்களின் கவனத்தை ஈர்த்து வரும் விண்ட்சர் அரச குடும்பத்துக்கு, அந்தப் புகழைச் சமூக நலனுக்கான செயல்பாடுகளாக மாற்ற வேண்டிய பொறுப்பு இப்போது வில்லியமிடம் உள்ளது.
எர்த்ஷாட் விருது அவருக்கு அதற்கான ஒரு வாய்ப்பை வழங்கலாம். ஆனால், தொலைக்காட்சி நிகழ்ச்சிகளில் எவ்வளவு இயல்பாகப் பேசுகிறார், மும்பையில் எத்தனை கேமராக்கள் அவரைப் பின்தொடர்கின்றன என்பதல்ல எதிர்கால மன்னருக்கான உண்மையான அளவுகோல்.
கேமராக்கள் விலகிய பிறகும், அவர் தலைமை ஏற்கவிருக்கும் அரச குடும்பத்தின் மீதான மக்களின் நம்பிக்கை நீடிக்கிறதா என்பதே மிக முக்கியமான கேள்வி!
