Madras Murasu

திருமண உதவித் திட்டமாக ‘அண்ணன் சீர்’ திட்டம்! ரூ.812 கோடி நிதி ஒதுக்கீடு – விண்ணப்பிப்பது எப்படி?

தமிழகத்தில் ஏழை எளிய குடும்பங்களைச் சேர்ந்த பெண்களின் திருமணத்திற்கு உதவும் வகையில், ‘அண்ணன் சீர்’ என்ற புதிய நலத்திட்டத்தை தமிழக அரசு அறிவித்துள்ளது. இத்திட்டத்தைச் செயல்படுத்துவதற்காக ரூ.812 கோடி நிதி ஒதுக்கப்பட்டுள்ளது. இதற்கான வழிகாட்டு நெறிமுறைகளை சமூக நலன் மற்றும் மகளிர் உரிமைத்துறை வெளியிட்டுள்ளது.

இதனை சமூக நலன் மற்றும் மகளிர் உரிமைத்துறை அமைச்சர் கு. சதீஸ்வரி தெரிவித்துள்ளார்.

விண்ணப்பிப்பது எப்படி?

இத்திட்டத்தின் கீழ் பயன்பெற விரும்புவோர் அருகிலுள்ள அரசு இ-சேவை மையங்கள் அல்லது தமிழ்நாடு அரசின் இ-சேவை இணையதளமான https://www.tnesevai.tn.gov.in மூலம் விண்ணப்பிக்கலாம்.

திருமணத்திற்கு 60 நாட்களுக்கு முன்பிருந்து திருமண நாள் வரை விண்ணப்பிக்கலாம். 05.10.2026 முதல் 15.01.2027 வரை நடைபெறும் திருமணங்களுக்கு 15.01.2027 வரை விண்ணப்பிக்க அனுமதி வழங்கப்பட்டுள்ளது.

யாரெல்லாம் விண்ணப்பிக்கலாம்?

  1. மணமக்கள் சட்டப்படி நிர்ணயிக்கப்பட்ட திருமண வயதைப் பூர்த்தி செய்திருக்க வேண்டும்.
  2. மணமகளின் குடும்ப ஆண்டு வருமானம் ரூ.2.5 லட்சத்திற்கு மிகாமல் இருக்க வேண்டும்.
  3. பொது விநியோகத் திட்டத்தின் கீழ் வழங்கப்பட்ட குடும்ப அட்டையில் மணமகளின் பெயர் இடம்பெற்றிருக்க வேண்டும்.

விண்ணப்பத்தின் நிலையை அறியலாம்!

விண்ணப்பதாரர்களுக்கு தனித்துவமான விண்ணப்ப எண் வழங்கப்படும். விண்ணப்பத்தின் நிலை குறித்த தகவல்கள் குறுஞ்செய்தி, வாட்ஸ் அப் மற்றும் மின்னஞ்சல் மூலம் தெரிவிக்கப்படும்.

திருமணம் நடைபெற்ற 15 நாட்களுக்குள் திருமணத்தைப் பதிவு செய்ய வேண்டும் என்றும் அறிவுறுத்தப்பட்டுள்ளது.

பெண்களின் திருமணத்திற்கு அரசின் உதவி

ஒரு பெண்ணின் திருமணம் என்பது குடும்பத்தின் மகிழ்ச்சியும் புதிய வாழ்க்கையின் தொடக்கமும் ஆகும். அந்த மகிழ்ச்சியான தருணத்தில் தமிழகப் பெண்களுக்கு அண்ணனாக இருந்து அன்பையும் உரிமையையும் சீராக வழங்கும் நோக்கில் இத்திட்டம் செயல்படுத்தப்படுவதாக அமைச்சர் தெரிவித்துள்ளார்.

தகுதியுள்ள பயனாளிகளுக்கு உரிய உதவிகள் சென்றடைவதை உறுதி செய்ய சமூக நலத்துறை அதிகாரிகளுக்கு அறிவுறுத்தப்பட்டுள்ளது.

ஆதாரம்: தமிழ்நாடு அரசின் செய்தி மக்கள் தொடர்புத்துறை செய்தி வெளியீடு எண் 1078, நாள் 17.11.2026.

DIPR-P.R.No.1078-Hon’ble Minister for Social Welfare and Women Empowerment-Annan Seer Scheme-Press Release-Date 17.11.2026.pdf
Scroll to Top