இது தொடர்பாக சமூக ஊடக எக்ஸ் தளத்தில் இணையமைச்சர் டாக்டர் எல். முருகன் வெளியிட்டுள்ள பதிவில், தமிழ்நாட்டின் ரயில்வே உட்கட்டமைப்பு மேம்பாட்டிற்கான தமது கோரிக்கையை ஏற்று, ஆடுதுறை – கும்பகோணம் – சுந்தரபெருமாள் கோவில் இடையிலான ஒற்றை ரயில் பாதையை இரட்டை ரயில் பாதையாக மாற்றும் பணிக்கு ஒப்புதல் அளித்தமைக்காக மத்திய ரயில்வே அமைச்சர் அஸ்வினி வைஷ்ணவுக்கு மனமார்ந்த நன்றியைத் தெரிவித்துக் கொள்வதாகக் குறிப்பிட்டுள்ளார்.
தமிழ்நாட்டின் வளர்ச்சிக்கும், மக்களின் நீண்டநாள் கோரிக்கைகளை நிறைவேற்றுவதற்கும் தொடர்ந்து முன்னுரிமை அளித்து வரும் பிரதமர் திரு நரேந்திர மோடிக்கும் நன்றி தெரிவிப்பதாக அவர் கூறியுள்ளார். இந்த இரட்டை ரயில் பாதைத் திட்டம், இப்பகுதி மக்களின் பயண வசதியை மேம்படுத்துவதுடன், ரயில் போக்குவரத்துத் திறனையும், பிராந்திய இணைப்பையும் மேலும் வலுப்படுத்தும் என்று டாக்டர் எல். முருகன் தெரிவித்துள்ளார்.