’’புதிய தொழில்நுட்பங்களின் வளர்ச்சியை தொடர்ந்து கவனித்து வர வேண்டும். தொழில்நுட்பத்தின் எல்லைகளை விரிவுபடுத்தும் வளர்ந்து வரும் தொழில்நுட்பங்களை கற்றுக்கொள்வதிலும், அவற்றைப் பயன்படுத்துவதிலும் தொடர்ந்து ஆர்வம் காட்ட வேண்டும்” என்று ஆர்.எம்.கே. பொறியியல் கல்லூரியில் முதலாம் ஆண்டு மாணவர்களிடையே ஜெயபிரகாஷ் ஏ. காந்தி பேசினார்.
சென்னை – கொல்கத்தா தேசிய நெடுஞ்சாலையில் உள்ள கவரப்பேட்டையில், ஆர்.எம்.கே. கல்விக் குழும நிறுவனங்களின் சார்பில், ஆர்.எம்.கே. பொறியியல் கல்லூரியில் 2026–27 கல்வியாண்டிற்கான முதலாம் ஆண்டு B.E., B.Tech., M.E. மற்றும் MBA வகுப்புகளின் தொடக்க விழா ஆகஸ்ட் 31, 2026 அன்று கல்லூரி அரங்கில் நடைபெற்றது.
விழாவின் தொடக்க நிகழ்வாக, ஆர்.எம்.கே. பொறியியல் கல்லூரி முதல்வர் டாக்டர் கே.ஏ. முகமது ஜுனைத், துறைத் தலைவர்களை அறிமுகப்படுத்தியதுடன், கல்வி நிறுவனத்தின் முக்கிய சாதனைகள் மற்றும் சிறப்பான செயல்பாடுகளை எடுத்துரைத்தார். விழாவில் கலந்து கொண்ட சிறப்பு விருந்தினர்கள், பேராசிரியர்கள், மாணவர்கள் மற்றும் பெற்றோர்கள் அனைவரையும் வரவேற்று வரவேற்புரையாற்றினார்.
ஆர்.எஸ். முனிரத்தினம் வாழ்த்து
விழாவிற்கு வித்யா ரத்னா திரு. ஆர்.எஸ். முனிரத்தினம், ஆர்.எம்.கே. கல்விக் குழும நிறுவனங்களின் நிறுவனர் மற்றும் தலைவர், தலைமை வகித்தார். தனது உரையில் ஆர்.எம்.கே. குழுமக் கல்வி நிறுவனங்களின் வரலாறு, வளர்ச்சி மற்றும் சாதனைகளை எடுத்துரைத்தார்.
மேலும், மாணவர்களின் வாழ்க்கையில் கல்வியின் முக்கியத்துவத்தை வலியுறுத்திய அவர், மாணவர்கள் பொறியியல் பாடங்களில் மட்டும் கவனம் செலுத்தாமல், சமூகத்தில் நிலவும் பல்வேறு பிரச்சினைகளுக்கு புதுமையான தீர்வுகளை உருவாக்கும் திறனையும் வளர்த்துக் கொள்ள வேண்டும் என்று அறிவுறுத்தினார்.
எதிர்கால தொழில்நுட்பம்
விழாவில் சிறப்பு விருந்தினராகப் பங்கேற்ற பிரபல தொழில் மற்றும் வேலைவாய்ப்பு ஆலோசகரும், கல்வி மற்றும் தொழில் ஆய்வாளருமான ஜெயபிரகாஷ் ஏ. காந்தி, முதலாம் ஆண்டு மாணவர்களுக்கு சிறப்புரையாற்றினார்.
தற்போதைய பொறியியல் கல்வியின் நிலை, தொடர்ச்சியான கற்றலின் அவசியம் மற்றும் எதிர்கால தொழில்நுட்ப வளர்ச்சிகள் குறித்து அவர் விரிவாக எடுத்துரைத்தார். மேலும், புதிய தொழில்நுட்பங்கள் பொறியியல் துறையில் ஏற்படுத்தக்கூடிய தாக்கம் மற்றும் வளர்ந்து வரும் தொழில்துறைகளில் உருவாகும் வேலைவாய்ப்புகள் குறித்தும் மாணவர்களுக்கு பயனுள்ள தகவல்களைப் பகிர்ந்து கொண்டார்.
உலக அளவில் முன்னணி நிறுவனங்களாக உருவெடுத்துள்ள சில நிறுவனங்களின் வளர்ச்சி, வரலாறு மற்றும் தொழில்நுட்ப முன்னேற்றங்களை எடுத்துக்காட்டாகக் குறிப்பிட்ட அவர், எதிர்காலத்தில் மாணவர்கள் தங்களது திறன்களை தொடர்ந்து மேம்படுத்திக் கொள்ள வேண்டியதன் அவசியத்தை வலியுறுத்தினார்.
“எதிர்கால பொறியாளர்களாகிய நீங்கள், புதிய தொழில்நுட்பங்களின் வளர்ச்சியை தொடர்ந்து கவனித்து வர வேண்டும். தொழில்நுட்பத்தின் எல்லைகளை விரிவுபடுத்தும் வளர்ந்து வரும் தொழில்நுட்பங்களை கற்றுக்கொள்வதிலும், அவற்றைப் பயன்படுத்துவதிலும் தொடர்ந்து ஆர்வம் காட்ட வேண்டும்” என்று ஜெயபிரகாஷ் ஏ. காந்தி கூறினார்.
முதலாம் ஆண்டு வகுப்புகள்
விழாவில் ஆர்.எம்.கே. குழுமக் கல்வி நிறுவனங்களின் இயக்குநர் ஆர். ஜோதி நாயுடு, துணைத் தலைவர்ஆர்.எம். கிஷோர், செயலாளர் யலமஞ்சி பிரதீப் ஆகியோர் கலந்து கொண்டு சிறப்பித்தனர்.
மேலும், ஆர்.எம்.கே. கல்விக் குழும நிறுவனங்களின் ஆலோசகர்களான தமிழ்நாடு திறந்தநிலைப் பல்கலைக்கழகத்தின் முன்னாள் துணைவேந்தர் டாக்டர் எம்.எஸ். பழனிச்சாமி, டி. பிச்சாண்டி, ஐ.ஏ.எஸ். (ஓய்வு), தமிழ்நாடு மினரல்ஸ் நிறுவனத்தின் முன்னாள் இயக்குநர் வி. மனோகரன், தொழில் ஆலோசகர்கள் டாக்டர் கே.கே. சிவஞான பிரபு, டாக்டர் கே. மணிவண்ணன் உள்ளிட்டோர் கலந்து கொண்டு விழாவை சிறப்பித்தனர்.
நிகழ்ச்சியின் இறுதியில் டாக்டர் எஸ். பாவை மகேஸ்வரி நன்றி கூறினார். இதனைத் தொடர்ந்து, 2026–27 கல்வியாண்டிற்கான முதலாம் ஆண்டு வகுப்புகள் தொடக்க விழா தேசிய கீதத்துடன் நிறைவுற்றது.