மேலும், அமோனியம் நைட்ரேட் அல்லது வெடிபொருள்கள் சட்டம், 1884-ன் கீழ் வெடிபொருளாக வகைப்படுத்தப்படும் எந்தப் பொருளையும் தனது தளத்தில் பட்டியலிடுதல், விளம்பரப்படுத்துதல், விற்பனைக்கு வசதி செய்தல் உள்ளிட்டவற்றை உடனடியாக நிறுத்துமாறு டயல்4டிரேட்டுக்கு CCPA உத்தரவிட்டுள்ளது.
கட்டாய பாதுகாப்பு நடைமுறைகள் இல்லை
டயல்4டிரேட் தளத்தை ஆய்வு செய்தபோது, அமோனியம் நைட்ரேட் விற்பனைக்கு போதுமான பாதுகாப்பு நடைமுறைகள் பின்பற்றப்படவில்லை என CCPA கண்டறிந்தது.
குறிப்பாக:
- விற்பனையாளரின் செல்லுபடியாகும் PESO உரிம விவரங்கள் வெளியிடப்படவில்லை.
- வாங்குபவரின் அடையாளம் மற்றும் உரிமம் பெற்ற தகுதி சரிபார்க்கப்படவில்லை.
- பரிவர்த்தனைகளை கண்காணிக்கவும் தடமறியவும் தேவையான நடைமுறைகள் இல்லை.
- பொருளை வைத்திருப்பதற்கும் பயன்படுத்துவதற்கும் உள்ள சட்டக் கட்டுப்பாடுகள் மற்றும் அங்கீகரிக்கப்படாத முறையில் வைத்திருந்தால் ஏற்படும் சட்ட விளைவுகள் குறித்து எச்சரிக்கைகள் வழங்கப்படவில்லை.
மேலும், அந்தப் பொருளின் பட்டியலில் வெடிப்பு மற்றும் குண்டுவெடிப்பு போன்ற காட்சிகள் இடம்பெற்றிருந்தன. இத்தகைய படங்கள், பொருளின் அபாயகரமான தன்மையை எடுத்துரைப்பதற்குப் பதிலாக அதன் மீது கவனத்தை ஈர்க்கும் வகையில் இருந்ததாக CCPA குறிப்பிட்டுள்ளது.
ஆன்லைன் பட்டியலும் ‘விளம்பரம்’தான்
இணையதளத்தில் ஒரு பொருளை பொதுமக்களுக்கு காட்சிப்படுத்தி, அதன் மூலம் வாங்குவதற்கான வாய்ப்பை ஏற்படுத்துவது, நுகர்வோர் பாதுகாப்புச் சட்டம், 2019-ன் பிரிவு 2(1)-ன் கீழ் “விளம்பரம்” என்ற வரையறைக்குள் வருகிறது என்று CCPA தெரிவித்துள்ளது.
உரிய உரிமம் இல்லாமல் சட்டப்படி வாங்க முடியாத வெடிபொருளை, சாதாரண நுகர்வோர் பொருளைப் போல ஆன்லைனில் விற்பனைக்கு வைப்பது தவறாக வழிநடத்தும் விளம்பரம் மற்றும் நியாயமற்ற வர்த்தக நடைமுறை எனவும் ஆணையம் தெரிவித்துள்ளது.
‘B2B தளம்’ என்ற வாதம் நிராகரிப்பு
டயல்4டிரேட், தான் ஒரு B2B (Business-to-Business) சந்தைத் தளம் என்றும், மூன்றாம் தரப்பு விற்பனையாளர்கள் பதிவேற்றும் பொருட்களுக்கு தன்னை பொறுப்பாக்க முடியாது என்றும் வாதிட்டது.
இந்த வாதத்தை CCPA நிராகரித்தது.
ஒரு யூனிட் அளவில்கூட பொருளை வாங்குவதற்கான வாய்ப்பு தளத்தில் இருந்ததாகவும், B2B பரிவர்த்தனைகளுக்கு வழக்கமாக காணப்படும் குறைந்தபட்ச ஆர்டர் அளவு அல்லது நிறுவன வாங்குபவர் சரிபார்ப்பு நடைமுறை இல்லாததாகவும் CCPA சுட்டிக்காட்டியது.
மேலும், ஒரு தளம் தனது வணிக மாதிரியை எவ்வாறு வகைப்படுத்திக் கொண்டாலும், நுகர்வோர் பாதுகாப்பு (மின்னணு வர்த்தகம்) விதிகள், 2020, marketplace e-commerce நிறுவனங்களுக்கும் பொருந்தும் என ஆணையம் தெரிவித்துள்ளது.
IT சட்டத்தின் ‘Safe Harbour’ வாதமும் நிராகரிப்பு
தகவல் தொழில்நுட்பச் சட்டம், 2000-ன் பிரிவு 79 வழங்கும் இடைத்தரகர் பாதுகாப்பை டயல்4டிரேட் மேற்கோள் காட்டியது.
ஆனால், அந்தப் பாதுகாப்பு உரிய Due Diligence நடைமுறைகளைப் பின்பற்றுவதற்கு உட்பட்டது என CCPA குறிப்பிட்டது.
பட்டியல் வெளியிடப்படும் நேரத்தில் சரிபார்ப்பு செய்வதற்குப் பதிலாக, விதிமீறல் கண்டறியப்பட்ட பிறகு மட்டும் பொருளை நீக்கும் நடைமுறை போதுமானதல்ல என்றும் ஆணையம் கூறியது.
மேலும், விற்பனையாளர்களைத் தடை செய்யவும் பொருட்களை தளத்திலிருந்து நீக்கவும் டயல்4டிரேட்டுக்கு திறன் இருந்ததால், தளத்தில் பதிவேற்றப்படும் உள்ளடக்கத்தின் மீது அந்த நிறுவனம் குறிப்பிட்ட அளவு கட்டுப்பாட்டைக் கொண்டிருந்ததாகவும் CCPA தெரிவித்துள்ளது.
பல மின்னணு வர்த்தக தளங்கள் மீது ஆய்வு
அபாயகரமான ரசாயனங்கள், வெடிபொருட்கள் மற்றும் அவற்றுடன் தொடர்புடைய மூலப்பொருட்களை சட்டவிரோதமாக ஆன்லைனில் விற்பனை செய்வது தொடர்பாக பல மின்னணு வர்த்தக தளங்களை CCPA தொடர்ந்து ஆய்வு செய்து வருகிறது.
ஆய்வுக்கு உட்படுத்தப்பட்ட பொருட்களில்:
- அமோனியம் நைட்ரேட்
- கன்பவுடர் (Gun Powder)
- பிக்ரிக் அமிலம் (Picric Acid)
- பென்டாஎரித்ரிட்டால் டெட்ராநைட்ரேட் (PETN)
ஆகியவை இடம்பெற்றுள்ளன.
தற்போது ஆய்வுக்கு உட்படுத்தப்பட்டுள்ள தளங்களில் IndiaMART, Justdial, Sigma-Aldrich India, Exporters India, Ibuychemikals, Alpha Chemika மற்றும் TradeIndia ஆகியவை இடம்பெற்றுள்ளன.
தளங்களுக்கு CCPA எச்சரிக்கை
அமோனியம் நைட்ரேட் ஒரு கட்டுப்படுத்தப்பட்ட பொருள் என்றும், சட்டப்படி நிர்ணயிக்கப்பட்ட பாதுகாப்பு நடைமுறைகள் இல்லாமல் அதை விற்பனை செய்வதும் வைத்திருப்பதும் பொதுமக்களின் பாதுகாப்புக்கு ஆபத்தை ஏற்படுத்தக்கூடும் என்றும் CCPA தெரிவித்துள்ளது.
ஆன்லைனில் பொருட்களை வாங்கும்போது நுகர்வோர், தளங்களில் வழங்கப்படும் பொருள் விவரங்கள் மற்றும் விளக்கங்களை நம்புவதால், கட்டுப்படுத்தப்பட்ட மற்றும் அபாயகரமான பொருட்களை கையாளும் போது மின்னணு வர்த்தக நிறுவனங்கள் உரிய Due Diligence நடைமுறைகளை மேற்கொள்ள வேண்டும் என்று CCPA வலியுறுத்தியுள்ளது.
நுகர்வோர் உரிமைகளைப் பாதுகாப்பது, நியாயமற்ற வர்த்தக நடைமுறைகளைத் தடுப்பது மற்றும் அபாயகரமான பொருட்கள் தொடர்பான மின்னணு வர்த்தக நிறுவனங்களின் சட்ட இணக்கத்தை வலுப்படுத்துவது தங்களது முக்கிய நோக்கம் எனவும் CCPA தெரிவித்துள்ளது.