குழந்தை பாக்கியத்திற்காக காத்திருக்கும் தம்பதிகளுக்கு தமிழக அரசு ஒரு மிகப்பெரிய நம்பிக்கை செய்தியை கொடுத்துள்ளது. தனியார் மருத்துவமனைகளில் லட்சக்கணக்கில் செலவு செய்து செயற்கை கருத்தரிப்பு சிகிச்சை எடுக்க முடியாமல் தவிக்கும் ஏழை மற்றும் நடுத்தர குடும்பங்களுக்காக, தமிழகம் முழுவதும் 30 இடங்களில் இந்திய மருத்துவ முறையில் கருத்தரிப்பு சிகிச்சை மையங்கள் அமைக்க அரசு அரசாணை வெளியிட்டுள்ளது.
சுகாதாரம் மற்றும் குடும்ப நலன் துறை வெளியிட்டுள்ள அரசாணையின் படி, தேசிய ஆயுஷ் இயக்கத்தின் கீழ் மாநில ஆண்டு செயல் திட்டம் 2026-2027-இல் இந்த திட்டத்திற்கு அனுமதி வழங்கப்பட்டுள்ளது.
இந்த திட்டம் குறித்து சுகாதாரத்துறை அமைச்சர் கடந்த 17.08.2026 அன்று சட்டசபையில் அறிவிப்பு எண்.14-இல், செயற்கை கருத்தரிப்பு சிகிச்சை முறையில் இந்திய மருத்துவ முறையை ஒருங்கிணைக்கும் விதமாக, தமிழ்நாட்டில் முதல்முறையாக முப்பது மருத்துவமனைகளில் செயல்பட்டு வரும் ஒருங்கிணைந்த மகப்பேறு மற்றும் தாய்சேய் பராமரிப்பு பிரிவுடன் இணைந்து இந்திய மருத்துவ கருத்தரிப்பு சிகிச்சை மையங்கள் ரூ.1.03 கோடி மதிப்பீட்டில் நிறுவப்படும் என அறிவித்திருந்தார். அந்த அறிவிப்புக்கு தற்போது செயல் வடிவம் கொடுக்கப்பட்டுள்ளது.
மொத்த திட்ட மதிப்பு ரூ.1 கோடியே 3 லட்சத்து 50 ஆயிரம். இதில் மருத்துவர்களின் சம்பளத்திற்காக மட்டும் ரூ.72 லட்சம் ஒதுக்கப்பட்டுள்ளது. 25 சித்தா மருத்துவர்களும், 5 யோகா மற்றும் இயற்கை மருத்துவ மருத்துவர்களும் இந்த மையங்களில் பணியாற்ற உள்ளனர். ஒவ்வொரு மருத்துவருக்கும் மாதம் ரூ.60,000 சம்பளம் வழங்கப்படும். அதேபோல் 30 நர்சிங் தெரபிஸ்டுகளுக்கு மாதம் ரூ.20,000 வீதம் மொத்தம் ரூ.24 லட்சம் ஒதுக்கப்பட்டுள்ளது. மற்ற செலவுகள், விழிப்புணர்வு மற்றும் பயிற்சிக்காக ரூ.7.50 லட்சம் ஒதுக்கப்பட்டுள்ளது.

இந்த மையங்கள் அனைத்தும் அரசு மருத்துவக் கல்லூரி மருத்துவமனைகளிலேயே அமைய உள்ளது என்பது குறிப்பிடத்தக்கது.
கோயம்புத்தூர், திருப்பூர், தர்மபுரி, கிருஷ்ணகிரி, திண்டுக்கல், திருவள்ளூர், கன்னியாகுமரி, மதுரை, நாகப்பட்டினம், புதுக்கோட்டை, ராமநாதபுரம், சேலம், சிவகங்கை, தஞ்சாவூர், திருவண்ணாமலை, தூத்துக்குடி, திருச்சி, கரூர், அரியலூர், வேலூர், விழுப்புரம், கள்ளக்குறிச்சி, விருதுநகர், திருநெல்வேலி உள்ளிட்ட மாவட்டங்களில் சித்தா முறையிலும், சென்னை திருவல்லிக்கேணி, தேனி ஆண்டிபட்டி, திருவாரூர், நாமக்கல், நீலகிரி ஊட்டி ஆகிய இடங்களில் யோகா மற்றும் இயற்கை மருத்துவ முறையிலும் இந்த மையங்கள் செயல்பட உள்ளன.
சென்னையில் மட்டும் திருவல்லிக்கேணி கஸ்தூரிபா காந்தி மகளிர் மற்றும் குழந்தைகள் மருத்துவமனை மற்றும் அண்ணா நகர் அறிஞர் அண்ணா இந்திய மருத்துவ மருத்துவமனை என இரண்டு இடங்களில் மையங்கள் அமைகின்றன.
இந்த மையங்களில் கருத்தரிப்பு சிக்கல் உள்ள தம்பதிகளுக்கு சித்தா மற்றும் யோகா முறையில் இயற்கையான முறையில் சிகிச்சை, ஆலோசனை, உணவு முறை, வாழ்வியல் மாற்றம் குறித்து வழிகாட்டுதல் வழங்கப்படும். ஏற்கனவே செயல்பட்டு வரும் மகப்பேறு மற்றும் தாய்சேய் பராமரிப்பு பிரிவுடன் இணைந்து செயல்படுவதால், கருத்தரித்த பின்னர் தொடர் கண்காணிப்பு மற்றும் பாதுகாப்பான பிரசவம் வரை ஒரே இடத்தில் சிகிச்சை கிடைக்கும்.
தமிழகத்தில் முதல்முறையாக அரசு மருத்துவமனைகளில் சித்தா முறையில் கருத்தரிப்பு சிகிச்சையை கொண்டு வரும் முன்னோடி திட்டமாக இது பார்க்கப்படுகிறது. இதன் மூலம் லட்சக்கணக்கில் செலவு செய்ய முடியாத குடும்பங்கள், பக்கவிளைவுகள் குறைவான இயற்கை முறை சிகிச்சையை அரசு மருத்துவமனையிலேயே பெற முடியும் என்பது இந்த திட்டத்தின் மிகப்பெரிய சிறப்பாகும்
