இதுகுறித்து, விடுதலைச் சிறுத்தைகள் கட்சி நிறுவனர்- தலைவர், தொல். திருமாவளவன் வெளியிட்ட அறிக்கை:

மாநில உரிமைகள் பெருமளவில் பறிக்கப்படும் இன்றைய சூழலில் ஒன்றிய அரசுக்கும் மாநில அரசுகளுக்கும் இடையிலான உறவை ஆராய்ந்து பரிந்துரைகள் செய்வதற்கு ஆணையம் ஒன்றைத் தமிழ்நாடு அரசு அமைக்க வேண்டும் என விடுதலைச் சிறுத்தைகள் கட்சியின் சார்பில் கேட்டுக்கொள்கிறோம்.

தமிழ்நாடு அரசால் இயற்றப்பட்ட சட்டங்களுக்கு ஒப்புதல் தராததோடு மாநில நிர்வாகத்தையே முடக்கும் வகையில் ஆளுநர் செயல்பட்டு வருவதால் இப்போது தமிழ்நாடு அரசு அவருக்கு எதிராக உச்சநீதிமன்றத்தில் வழக்கு தொடரவேண்டிய நிலை ஏற்பட்டுள்ளது. மாநில அரசுகளை அதிகாரமற்றவையாக ஆக்குவதன்மூலம் ‘ஒரே நாடு ஒரே ஆட்சி’ என ஆக்குவதற்கு ஒன்றிய பாஜக அரசு முயற்சிக்கிறது.

இந்திய ஒன்றிய அரசுக்கும் மாநில அரசுகளுக்கும் இடையிலான உறவுகள் குறித்து நமது அரசியலமைப்புச் சட்டத்தின் பாகம்-11இல் தெளிவுபடுத்தப்பட்டுள்ளது. அரசியலமைப்புச் சட்டத்தில் கூறப்பட்டதற்கு மாறாக அப்போதிருந்த இந்திய ஒன்றிய அரசு மாநில உரிமைகளைப் பறிக்கத் தொடங்கியது. அதற்கு எதிரான குரல்கள் 1960-களிலேயே ஒலிக்கத் தொடங்கின. அதனால் மத்திய- மாநில உறவுகளை ஆய்வுசெய்வதற்காக நிர்வாக சீர்திருத்த ஆணையத்தை (1966) ஒன்றிய அரசு அமைத்தது. அந்த ஆணையமும் பல்வேறு பரிந்துரைகளை வழங்கியது.

நிர்வாக சீர்திருத்த ஆணையத்தின் செயல்பாட்டில் மன நிறைவுகொள்ளாத அன்றைய தமிழ்நாடு அரசு 1969 ஆம் ஆண்டு நீதிபதி பி.வி. இராஜமன்னார் தலைமையில் ஒரு ஆணையத்தை அமைத்தது. அந்த ஆணையத்தின் பரிந்துரைகளின் அடிப்படையில் மாநில சுயாட்சிக்கான தீர்மானம் தமிழக சட்டப்பேரவையில் நிறைவேற்றப்பட்டு மத்திய அரசுக்கு அனுப்பப்பட்டது. தமிழக அரசு இயற்றிய மாநில சுயாட்சி தீர்மானம் இந்தியா முழுவதும் மாநில உரிமைகள் குறித்த விழிப்புணர்வை உருவாக்கியது.

பஞ்சாப் மாநிலத்தில் அகாலிதளம் கட்சி அனந்தபூர் சாகிப் தீர்மானத்தை (1973) இயற்றவும்; மேற்குவங்கத்தை ஆட்சி செய்துவந்த இடதுசாரி அரசாங்கம் மத்திய மாநில உறவு குறித்த அறிக்கை ஒன்றை வெளியிடவும் (1977) அதுவே தூண்டுகோலாக அமைந்தது. அவற்றின் காரணமாக மத்திய – மாநில உறவுகளை ஆராய 1983 ஆம் ஆம் ஆண்டில் சர்க்காரியா ஆணையமும் 2007 ஆம் ஆண்டு நீதிபதி பூஞ்ச்சி ஆணையமும் ஒன்றிய அரசால் அமைக்கப்பட்டன. அவற்றின் பரிந்துரைகள் இன்னும் நிறைவேற்றப்படாமலேயே கிடப்பில் உள்ளன.

தற்போதைய ஒன்றிய பாஜக அரசின் அதிகாரக் குவிப்பு நடவடிக்கை இதுவரை அமைதி காத்து வந்த மாநிலங்களிலும்கூட உரிமைக்கான வேட்கையை அதிகரிக்கச் செய்துள்ளது. இந்தச் சூழலைப் பயன்படுத்திக்கொண்டு மாநில உரிமைகள் குறித்த புரிதலை இந்திய அளவில் எடுத்துச்செல்ல வேண்டிய கடமை தமிழ்நாடு அரசுக்கு இருக்கிறது.

மத்திய – மாநில உறவுகளில் ஏற்பட்டுள்ள சிக்கல்களின் புதிய பரிமாணங்களை அடையாளம் காணவும், மாநிலங்களின் அதிகாரங்களை மீட்டெடுக்கவுமான பரிந்துரைகளைச் செய்வதற்கு 1969 இல் இராஜமன்னார் குழு அமைக்கப்பட்டதுபோல் தற்போதும் குழு ஒன்றை அமைத்திட தமிழக அரசு முன்வரவேண்டும் என மாண்புமிகு முதலமைச்சர் அவர்களைக் கேட்டுக்கொள்கிறோம்.

The post ’’மத்திய – மாநில உறவுகளை ஆய்வுசெய்ய ஆணையம் அமைக்க வேண்டும்..!’’ தொல். திருமாவளவன் first appeared on Madras Murasu.

நவீன யுக்தி… இளம்தலைமுறைக்கும் வாய்ப்பை உருவாக்குதல் போன்ற திட்டங்களை கையில் எடுத்து ,அடுத்த பாய்ச்சலுக்கு அணியமாவோம் என்ற முனைப்போடு 2024 நாடாளுமன்ற தேர்தலுக்கான வேலைகளில் தீவிரமாக இறங்கியுள்ளது விசிக. அதன்படி தமிழ்நாட்டை நான்கு மண்டலமாக பிரித்து அதில் ஒரு பகுதியாக விழுப்புரம், கடலூர், கள்ளக்குறிச்சி,பெரம்பலூர், காஞ்சிபுரம், அரக்கோணம், வேலூர் உள்ளிட்ட 13 நாடாளுமன்ற தொகுதிகளை இணைத்து வடக்கு மண்டலமாக அறிவித்து, 13 நாடாளுமன்ற தொகுதிகளுக்கும் பொறுப்பாளர்களை அறிவித்து அனைத்து வாக்குச்சாவடிகளுக்கும் முகவர்களை நியமனம் செய்து அவர்களுக்கான பயிற்சி முகாமை அக்கட்சியின் தலைவர் தொல்.திருமாவளவன் தலைமையில் சென்னை நந்தனம் ஒய்எம்சிஏ மைதானத்தில் நடைத்தியது.

இதுவரை திமுக, அதிமுக ஆகிய இருபெரும் திராவிட கட்சிகள் மட்டுமே தேர்தலுக்காக வாக்குச்சாவடி முகவர்களை நியமித்து அவர்களுக்கான பயிற்சி முகாம்களை நடத்தியது. இப்பொழுது திமுக,அதிமுகவிற்கு இணையாக அல்ல அதைவிட ஒரு படி கூடவே மாஸ் காட்டி சென்னையில் வாக்குச்சாவடி முகவர்களுக்கான பயிற்சி பட்டறையை சக்சஸ்ஃபுல்லாக நடத்தியுள்ளது விசிக. சுமார் 10 ஆயிரம் வாக்குச்சாவடி முகவர்களை அடையாள அட்டையுடன் சரிபாரத்து அவர்களை பிரமாண்ட அரங்கில் கூட்டி திமுக, அதிமுக ஆகிய இரண்டு பெரிய திராவிட கட்சிகளும் வியக்கும் அளவிற்கு பயிற்சி முகாம் நடத்தியுள்ளது.
விசிக என்றாலே மேடை ஒழுங்கு இருக்காது என்கிற கருத்தை முழுமையாக ஒழித்துள்ளது விசிக. திட்டமிட்ட நிகழ்வு, தலைவரின் ராம்ப் வாக், முறையான இருக்கை அமைப்பு என அசத்தியிருக்கிறார்கள். இது மற்ற அரசியல் கட்சிகளையே வியப்பில் ஆழ்த்தியுள்ளது. அதுமட்டுமில்லையாம் வரும் டிசம்பர் மாதம் 23 தேதி திருச்சியில் ‘வெல்லும் ஜனநாயகம்’ என்கிற தலைப்பில் பிரமாண்ட மாநாட்டை தடத்த உள்ளார்கள். நூறு ஏக்கர் பரப்பளவில் 10 லட்சம் பேரை இந்த மாநாட்டில் ஒன்று கூட்டி இனி விசிக-வை தமிழகத்தில் தவிர்க்க முடியாத சக்தியாக காட்ட முணைந்துள்ளார்கள்.

நாடாளுமன்ற தேர்தல் ஜுரம் ஆரம்பித்துவிட்டது..!

The post ’’மாஸ் காட்டும் விடுதலை சிறுத்தைகள்..!’’ நாடாளுமன்ற தேர்தல் வேலையை தொடங்கி விட்டது first appeared on Madras Murasu.