’’விளையாட்டு சங்கங்களுக்கு தமிழ்நாடு அரசு எச்சரிக்கை..!’’

தமிழ்நாடு விளையாட்டு மேம்பாட்டு ஆணையத்தின் மூலம் வரையறுக்கப்பட்ட ஆவணங்களை முழுமையாக சமர்ப்பிக்கும் மாநில விளையாட்டு சங்கங்களுக்கு மட்டுமே அங்கீகாரம் வழங்கப்பட்டுவருகிறது. அங்கீகரிக்கப்பட்ட விளையாட்டு சங்கங்களுக்கு தமிழ்நாட்டில், மாநில/தேசிய போட்டிகள் நடத்திடவும், தேசியப் போட்டிகளில் தமிழ்நாடு அணிகள் பங்கேற்பதற்கான மானியமும் வழங்கப்பட்டு வருகிறது. மேலும், விளையாட்டு ஒதுக்கீட்டின்கீழ் பொறியியல், மருத்துவம் மற்றும் பிற தொழில் முறை படிப்புகளுக்கு விண்ணப்பிக்கும் விளையாட்டு வீரர்களுக்கு , அங்கீகரிக்கப்பட்ட மாநில சங்கங்கள் வழங்கும் விளையாட்டு போட்டிக்கான சான்றிதழ்கள் அடிப்படையில் மதிப்பெண்கள் வழங்கப்பட்டுவருகிறது.

பல்வேறு விளையாட்டு சங்கங்கள் மற்றும் இதன் தொடர்புடைய தேசிய கூட்டமைப்புகள் போட்டி நடத்திடும் அமைப்புகளாக மட்டுமே செயல்படுகின்றன. மேலும் இதுபோன்ற விளையாட்டு கூட்டமைப்புகள் இளைஞர் விவகாரங்கள் மற்றும் விளையாட்டு அமைச்சகத்தின் அங்கீகாரம் பெறாமல் செயல்படுகின்றன.  இப்போலிச் சங்கங்கள் விளையாட்டு போட்டிக்கான சான்றிதழ்களை வழங்கி வீரர்களை தவறாக வழி நடத்துகின்றன.

இதனால் பொறியியல் மற்றும்  பிற தொழில்முறை படிப்புகளில் சேர்க்கை , மற்றும் 3% விளையாட்டு ஒதுக்கீட்டின் கீழ் வேலை வாய்ப்பு  ஆகியவற்றில் போலியான மற்றும் அங்கீகாரம் பெறாத விளையாட்டு சங்கங்கள் வழங்கும் சான்றிதழ்களுக்கு மதிப்பெண்கள் வழங்குவதற்காக கோரிக்கைகள் பெறப்படுகின்றன.  தமிழ்நாட்டை சேர்ந்த விளையாட்டு வீரர்கள் பல்வேறு பிரச்சனைகளை எதிர்கொள்வதுடன், விளையாட்டு வீரர்கள் மிகுந்தபாதிப்பிற்கு உள்ளாகநேரிடுகிறது.

போலியான மற்றும் அங்கீகாரம் பெறாத விளையாட்டு சங்கங்கள் சார்பில் வழங்கப்பட்ட முறையற்ற சான்றிதழ்களுக்கு மதிப்பெண் கிடைக்காமல் பலர் நீதிமன்றத்தில் வழக்கு தொடர்கின்றனர். மேலும், தமிழ்நாடு விளையாட்டு மேம்பாட்டு ஆணையம் அவப்பெயருக்கு உள்ளாகநேரிடுகிறது.

செல்வி. நித்தியா அவர்கள், சென்னை உயர்நீதிமன்றத்தில் தொடுத்தவழக்கு எண்.3447/2019-ல் மாண்புமிகு சென்னை உயர்நீதிமன்றம் 19.01.2022 அன்று வழங்கிய உத்தரவில், மாநில விளையாட்டு சங்கங்களை முறைபடுத்திட பல்வேறு வழிகாட்டுதல்களை வழங்கியுள்ளது. குறிப்பாக ஒவ்வொரு விளையாட்டுச் சங்கங்களும் /அமைப்பும் மாநிலஅரசிடம் கட்டாயமாகப் பதிவு செய்யப்பட்டிருக்க வேண்டும் என உத்தரவிட்டுள்ளது.

மேலும், சென்னை உயர்நீதிமன்றம் மாநில விளையாட்டு சங்கங்களை முறைப்படுத்திட வழங்கிய பல்வேறு வழிகாட்டுதல்களை கொண்டு தமிழ்நாடு விளையாட்டுச் சட்டத்தினை (Sports Act) நடைமுறைப்படுத்திட தமிழ்நாடு விளையாட்டு மேம்பாட்டு ஆணையத்தின் மூலம் நடவடிக்கை எடுக்கப்பட்டு வருகிறது.

இனிவரும் காலங்களில், விளையாட்டு வீரர்களது எதிர்காலத்தினைக்  கருத்தில் கொண்டும், மாண்புமிகு சென்னை உயர்நீதி மன்றம் 19.01.2022 அன்று வழங்கிய உத்தரவின்படி, அனைத்து விளையாட்டு சங்கங்களும் தமிழ்நாடு விளையாட்டு மேம்பாட்டு ஆணையத்தின் அங்கீகாரம் பெற்று இருக்க வேண்டும்.  அங்கீகாரம் பெற்ற மாநில விளையாட்டு சங்கங்கள் மற்றும் தொடர்புடைய அகில இந்திய சம்மேளனம் வழங்கிடும் சான்றிதழ்கள் மட்டுமே பொறியியல், பிற தொழில்முறை படிப்புகளில், 3% விளையாட்டு ஒதுக்கீட்டின் கீழ் வேலை வாய்ப்பு மற்றும் உயரிய ஊக்க தொகை வழங்கிட பரிசீலிக்கப்படும்.

அனைத்து விளையாட்டு வீரர்/வீராங்கனைகள் தாங்கள் பங்கேற்கும் போட்டிகள் அங்கீகாரம் பெற்ற விளையாட்டு சங்கங்கள் மூலம் நடத்தப்படுகின்றதா என்பதை அறிந்து போட்டிகளில் பங்கேற்குமாறு தெரிவித்துக் கொள்ளப்படுகிறது.

மேலும், தமிழ்நாடு விளையாட்டு மேம்பாட்டு ஆணையத்தின் அங்கீகாரம் பெறாமல், இவ்வாணையத்தின் பெயர் மற்றும் முத்திரையை பயன்படுத்துவது மற்றும் விதி முறைகளுக்கு புறம்பாக இவ்வாணையத்தின் பெயரை குறிப்பிட்டு சான்றிதழ்கள் மற்றும் படிவம் (I and II) வழங்கும் மாநில விளையாட்டு சங்கங்களின் மீது சட்டரீதியாக நடவடிக்கை எடுக்கப்படும் என தெரிவித்துக் கொள்ளப்படுகிறது என்று

தமிழ்நாடு விளையாட்டு மேம்பாட்டு ஆணையம் உறுப்பினர் செயலர் எச்சரித்துள்ளார்.